Die jaarlikse Tooi Turkoois vir Bejaardes-inisiatief is van 15 Mei tot 15 Junie. Alle Suid-Afrikaners word genooi om hulself, hul strate en dorpe in turkoois te tooi vir bejaardes.
Die hoofdoel van dié projek is om fondse in te samel vir bejaarde ondersteuning. Tooi Turkoois skep ook die geleentheid om kritieke aspekte rondom bejaardes uit te lig en aan te spreek.
Die sigbare deel van die veldtog duur vanaf 15 Mei – wat Internasionale Familiedag is – tot 15 Junie – wat die Wêreld Bewustheidsdag vir Bejaardemishandeling is.
Weens Covid-19 was die afgelope twee jaar ‘n uitdaging vir bejaardes. In afsondering was hulle sonder die lag en drukkies van hul geliefdes. Daar was maande aaneen geen besoeke van kinders, familie en vriende.
Met die moontlikheid van ’n vyfde vlaag van Covid-19 infeksies, het die organiseerders van die Tooi Turkoois-inisiatief besluit om geen groot byeenkomste te hou nie. Daar gaan wel kleiner geleenthede wees om bejaardes te bederf.
Die fokus is vanjaar op die Word Warm-projek. Tooi Turkoois se doel in 2022 is om die winterkoue vir dié wat blootgestel is, te verlig deur ’n verskeidenheid items, wat mense help om warm te word, te skenk aan dié in nood. Dit sluit die volgende items in: truie, serpe, baadjies, handskoene, langbroeke, kouse en skoene, musse, komberse, warm sop of ’n bord kos.
Ons Tuis het ongelooflike groot waardering en dankbaarheid vir die Tooi Turkoois-veldtog wat deur die Nederduitsch Hervormende Kerk van Afrika gelei word.
Ons sien met groot afwagting uit na hoe die veldtog vanjaar uitgeleef gaan word.
Turkoois bo! Indien u op ander maniere betrokke wil raak, ondersteuning wil gee of bydra wil lewer kontak gerus mev. Fourie by 012 3251857 of stuur ’n e-pos aan hf@otmt.org.
