Dawie Joubert en Marié Coetzee, albei inwoners van Ons Tuis Emily Hobhouse, het op Saterdag 25 Junie 2022 die knoop deurgehak toe hulle ewige trou aan mekaar belowe het.
“Tannie Marié is ʼn bondel energie en oom Dawie staan altyd reg om te help,” vertel Natasha van Tonder, maatskaplike werker verbonde aan Ons Tuis.
Wanneer die egpaar oor hulle verhouding van die afgelope jaar en vier maande gesels, kan jy nie anders as om saam met hulle die mooi van liefde te waardeer nie. Hulle het mekaar by Ons Tuis Emily Hobhouse ontmoet waar hulle net 3 kamers van mekaar af gebly het.
“Ek het haar die eerste keer van agter af gesien,” skerts Dawie. “Die twee boudjies hier voor my was vir my al te mooi!” las hy ondeund by.
Nie lank daarna nie het ʼn vriendin van hom voorgestel dat hy moet gaan kyk hoe mooi Marié se kamer is. “Ek het geen oortuiging nodig gehad nie en het toe maar na die kamer gaan loer.”
Dit is hier waar Marié ook ʼn spreekbeurt kry en gretig vertel hoe sy haar kans gevat het om hom vinnig vir koffie te nooi net toe hy so half onwillig wou omdraai en uitstap.
“Dawie het nie gras onder sy voete laat groei nie en my kort daarna vir ete uitgeneem. Van daar af het ons volstoom begin kuier!”
Op die vraag of die ou tannies lekker geskinder het toe die vryery so vinnig op dreef gekom het, antwoord hulle byna gelyk: “Oe, jy moenie eers praat nie! Maar ons is darem nou getroud, so hulle is nou weer stil!”
Marié is al vir 25 jaar ʼn weduwee en Dawie stap die pad al vir 35 jaar alleen.
“Ek het die Vader gevra om vir my iemand te stuur,” deel Dawie op ʼn ernstiger noot. “Toe stuur Hy vir my iemand wat soos ʼn handskoen by my pas.”
Dawie verklap blinkoog hoe hy die jawoord gevra het: “Ons het maar eendag so gesit en gesels toe ek vir Marié sê ek dink dis tyd vir ons hoendertjies om op een stellasie te wees. Sy het ook so gedink.”
Die ring het ʼn dieprooi granaatsteen; dieselfde kleur as Marié se rok toe sy met die troumars in die gangetjie op pad na haar bruidegom afgestap het.
Alhoewel hulle saamstem dat enige verhouding uit gee én neem bestaan, klink dit nie asof die aanpassing té groot is nie. Hulle vertel hoe hulle die meeste van die tyd op dieselfde manier dink en ook hoe baie belangstellings hulle deel. Beide is veral baie lief vir kosmaak.
“As ek die pampoen vat, vat hy die aartappels. Ons maak ʼn goeie span.”
Musiek is nog ʼn liefde wat hulle deel. Dawie rig die tehuis se koor af en speel tydens kerkdienste die orrel. Waar hy baie van klassieke musiek hou, luister Marié weer van Elvis tot boeremusiek.
“As plaaskinders kén ons van meelvloere, two-step en wals!”
Vir Marié is Dawie se Christenskap, sy geloof en opregtheid van sy mooiste eienskappe. Dawie prys op sy beurt Marié se liefdevolle karakter, haar vriendelikheid en behulpsaamheid. “Sy het my ook geleer om altyd ʼn lappie byderhand te hou. Sy kan vir jou skoonmaak hoor!”
Dawie en Marié se hoendertjies gaan eersdaags by een van die selfsorgeenhede van die tehuis bymekaarkom wanneer hulle daarheen trek.
Vir meer inligting oor Ons Tuis-tehuise, besoek gerus hulle webwerf of Facebook-blad, of skakel vir Hannelie Fourie by 012 325 1857/8.
