| “Die Ons Lig Luisterstorie-projek het net weer vir ons kom wys dat ‘n mens se ouderdom bloot net ‘n nommer is! Jy kan pret hê en teruggee aan die gemeenskap, maak nie saak hoe oud jy is nie.” Só sê Heleen van As, woordvoerder van die Ons Tuis aftree-groep wat einde November ‘n innoverende luisterstorie-projek vir die Afrikaanse jeug geloods het. Die vier voorlesings — opgeneem deur verskeie inwoners van 80-jaar plus — word op ‘n gebruikersvriendelike, interaktiewe manier met grafika as ‘n kort video voorgestel en kan gratis afgelaai word. “Toe ons die projek uitrol was die inwoners dadelik gretig om deel te neem. Die entoesiasme waarmee hul die opdrag uitgevoer het, is so kosbaar. Ons is dankbaar vir Lig in Duisternis Uitgewers, sonder wie die projek nie moontlik sou wees nie, en hoop om in die toekoms weer so iets saam te kan aanpak,” sê sy. Die vier titels, Die Wit Rokkie, Bekkie begeer alweer, Honkidôrie Hus en Millie se ontdekking, eggo dié Christelike uitgewer se strewe om leesstof met ‘n dieper betekenis aan te bied. Die interaktiewe “boekrak” kan gratis op beide Ons Tuis en Lig in Duisternis Uitgewers se webtuistes afgelaai word. Volgens Van As sal hierdie titels in harde kopie, beskikbaar op Lig in Duisternis se aanlyn boekwinkel, die perfekte kersgeskenk vir kinders wees. “Die rol wat ‘n bejaarde in kinders se lewe speel is van onskatbare waarde. Afgesien daarvan dat hierdie projek ‘n liefde vir lees by kinders prikkel, wou ons die ouer, Afrikaanse stem bied aan kinders wat self nie meer ‘n grootouer het nie, of dalk in ‘n ver land sit waar Afrikaanse boeke nie maklik bekombaar is nie. Dit kan ook heerlike binneshuise vermaak oor die feesseisoen verskaf as die weer nie saam speel nie,” verduidelik Van As. Ons Tuis stel graag die vier lesers aan u bekend:  Anna Marx (88) van Ons Tuis: Machteld Postmus lees Millie se ontdekking. Tannie Anna het die grootste deel van haar lewe in Pretoria, maar ook vir 30 jaar in Naboomspruit, gewoon. In haar jong dae was sy ’n proefleser wat onder andere vir Van Schaik gewerk het. Sy is baie lief vir lees en musiek. Sy stel nog graag musiekprogramme op. Millie se ontdekking word opgedra aan Anna se agterkleindogter Lisa Willemse (6). “’n Mens moet dankbaar wees vir elke liewe oggend wat jy wakker word. Leef jou lewe soos wat jy hom kry, maar dit moet ‘n nuttige lewe wees!”  Dawn van Straaten (83) van Ons Tuis: Machteld Postmus lees Bekkie begeer alweer. Dawn het in Kroonstad groot geword. Sy studeer onderwys en begin werk by ’n plaasskool digby Lichtenburg genaamd: Twee-buffels-met-een-skoot-mors-dood-geskietfontein! In 1961 trou sy met Jan van der Merwe en hul verhuis vir 17 jaar na Duitsland. Hul is geseënd met drie kinders. Dawn glo dat die geheim van ’n lang leeftyd romanse en verdraagsaamheid teenoor mekaar is. Haar gunsteling tydverdryf is om brug te speel. “Leef positief en hou vas aan jou godsdiens.”  Freda Surtees (88) van Ons Tuis: Machteld Postmus lees Honkiedôrie Hus. Freda is ’n vrou van vele talente. Dié ma van vyf het onder andere vir tien jaar haar eie kleuterskool gehad, ’n brei- en lapwinkel, sowel as ’n boutique met ’n ontwerper en twee voltydse kleremakers. Sy geniet dit vreeslik om te brei, veral komberse. Honkiedôrie Hus word opgedra aan haar ses kleinkinders en een agterkleinkind wat in Engeland woon. “Hou jou hand in die Here s’n en gee om vir mekaar. Wees lief vir jou naaste.”  Jettie Booyse (81) van Ons Tuis: Riviera lees Die Wit Rokkie. As 12-jarige dogtertjie het sy vir drie weke per boot gereis na Suid-Afrika om haar nuwe lewe in Carletonville te begin. Sy studeer verpleegkunde in Pretoria en werk tot op die ouderdom van 72 by ouetehuise. Jettie was ’n aktiewe swemmer en water-aërobiese oefeninge aangebied het. Sy dra Die Wit Rokkie op aan haar twee pleegkinders, Nico en Karina, en haar vier kleinkinders. “Bly aktief en doen wat die lewe vir jou lekker maak!”  Laai jou luisterstorie boekrak af deur Ons Tuis se webwerf te besoek of deur die QR-kode met jou slimfoon se kamera te skandeer. |
Lig vir jou siel by Ons Tuis Piet Potgieter se jaarlikse Kersliggiefees
November 13, 2023
Die jaarlikse Kersliggiefees, wat ten bate van Ons Tuis Piet Potgieter aangebied word, beloof om van 4 tot 25 Desember die inwoners van Mokopane in
