Ons spoggerige, nuwe, gebruikersvriendelike webwerf is aanlyn! Hier kan jul nou gemaklik snuffel en al die inligting rondom ons oorde — hul aktiwiteite, pragtige geriewe, tariewe asook aansoekvorms — bekom en dit selfs met vriende en familie deel.
‘n Nuwe toevoeging tot die nuwe webwerf wat egter vir my die meeste uitstaan is die feit dat ons die geleentheid gebruik om ons staatmaker bestuurders aan jul voor te stel. Elkeen van hierdie spesiale mense het ‘n unieke lewenspadjie wat hul passie vir bejaardesorg gedryf het. Om ouer persone met deernis, respek en geduld te versorg is nie ‘n werk nie, dis ‘n roeping! Ons Tuis, en die inwoners sal met ons saamstem, is geseënd om hul aan die stuur van sake te hê. |
Want, dit is hulle wat ‘n warm tuiste vir ons bejaardes skep. Hulle wat inisatief neem met verjaarsdae en ander spesiale dae om inwoners besonders te laat voel. Wat fondsinsamelings en kreatiewe aktiwiteite organiseer sodat bejaardes nog met hul talente en menswees kan spog en woeker. Hulle wat bystaan en ondersteun op moeilike dae wat die kinders te ver is.
Vandag wil ons aan elkeen van julle opreg kom dankie sê. Ons waardeer julle en sien jul raak! Doen so voort.
Vriendelike groete
Adv. Jaco Bothma
Besturende direkteur: Ons Tuis |
