Wanneer jy die voorreg het om daagliks met bejaardes om te gaan, het Maya Angelou se alombekende aanhaling ekstra betekenis: “Ek het geleer dat mense sal vergeet wat jy gesê of gedoen het, maar dat hulle nooit vergeet hoe jy hul laat voel het nie”.
Hierdie woorde beklemtoon dat jy die spoor is wat jy agterlaat; fisies en emosioneel! Toe tannie Bokkie Marais se kamer by Ons Tuis: Piet Potgieter verlede jaar opgepak moes word, het haar familie op só ‘n handgeskrewe bevestiging — ‘n kosbare vonds — gerig aan die matrone tussen haar besittings afgekom:
“Ek wil elkeen baie dankie sê vir die liefde en omgee vir my. Dit was vir my ‘n voorreg om hier te kon bly. Dit was my tuiste. Gee my opregte dank aan almal hier. |
Dit was my laaste blyplek. God se rykste seën wens ek julle toe. Met al my liefde. Tannie Bokkie Marias — Mei 2021”
Waar ek en jy aan die begin van ‘n nuwe kalenderjaar staan, vra ek graag: hoe lóóp jy? In die dolle gejaag van ons allerdaagse bestaan, maak ons tyd om op en om ons te kyk? Watter pad stap ons en is die fondasie stewig?
Ek wil jou uitdaag om vanjaar jou siel skatryk te maak deur op die mense rondom jou te fokus. Kyk hoe jy kan help en waar jy betrokke kan raak deur van jou tyd en Godgegewe talente te gebruik. Kom ons trap saggies maar laat diep spore na.
Vriendelike groete
Adv. Jaco Bothma
Besturende direkteur: Ons Tuis |
