Hierdie maand fokus ons op die kamer van respek as deel van die Ons Tuis se dinamiese
huis.
RESPEK is vir seker een van die belangrikste morele waardes van die mens. ‘n Twee-
rigting handeling. As deel van ons grootwordjare het ons gereeld ons ouers hoor sê: “Julle
moet respek hê vir ander,” maar wat beteken dit? Die woordeboek beskryf dit as ‘agting,
eer, bewondering, onderskeiding, hoflikheid, aansien, ordentlikheid’. Verder sien ons dat
respek afkomstig is van die Latynse woord wat verwys na “aandag”, “oorweeg” en “kyk
weer”, ‘n tweede blik.
Respek beteken letterlik: om ʼn tweede keer te kyk. Dit beteken om ons eerste opinie opsy te
skuif en weer ʼn keer, hierdie keer met nuwe oë, na mense te kyk. Dink net hoe ʼn groot
verskil dit sal maak as die groter wordende hoeveelheid mense van die land waarin ons bly,
mekaar met nuwe oë kan sien!
Sonder respek sal die samelewing in chaos gedompel wees, elke mens sal hom/haar – self
die reg toeëien dat hul lewens die belangrikste is, hul opinies al is wat tel en dat oortuigings
van ander nie tel nie.
Respek word aangeleer en beteken nie altyd dat ons op alle terreine met ander moet saamstem nie, maar om nie teen daardie persoon te diskrimineer of aanstoot te gee.
Respek is verder om verdraagsaam te wees met die persone wat nie dieselfde dink, optree
of belangstelling het as jy nie. Respek vir diversiteit van nuwe idees/opinies/lewenswyses is
uiters waardevol in samelewings wat streef na gesonde bestaan.
Hoe kan ek op myself fokus en respek uitleef?
Respek vir kinders en bejaardes (Luister en waardeer hul mening, gee aandag aan
hul behoeftes en beskerm hul regte)
Respek vir die omgewing (Hou ruimtes skoon, verwyder vullis, herwin, sorg en
beskerm die natuur)
Respek vir sosiale instellings (Respekteer infrastruktuur, paaie, parke, gehoorsaam
wette)
Respek vir verskille (Mense is verskillend, verskillende sienings, oortuigings,
gebruike, gelowe en tradisies. Dis die verskeidenheid wat die samelewing verryk.
Toon respek ten spyte van verskille.
Respek vir reëls (Gedragskodes wat by plekke of op ‘n sekere manier gevolg moet
word.
|
Byvoorbeeld, wees betyds vir ‘n doktersafspraak, vermy onnodige geraas in ‘n hospitaal, verminder spoed naby skole met kinders. Dit alles lei tot ‘n harmonieuse en gelukkige
samelewing)
Respek vir nasionale simbole (Dis om die volkslied te sing, respek te toon vir die
landsvlag, te leer van nasionale helde en die geskiedenis, om te bewaar vir die
nageslag)
Wat sê die Bybel vir ons?
Daar is baie verse in die Bybel wat oor eer en respek handel. Dit dui deurlopend daarop dat
respek altyd ’n goeie ding is – én dat dit belangrik is.
As jy respek nóg beter wil verstaan, dink aan wat dit nié is nie. Disrespek is wanneer jy nié
iemand anders se waarde erken nie, die eer weghou wat hulle toekom, of as jy iemand
verneder.
Die Bybel verwys na vier kategorieë wat respek moet ontvang: ouer mense, gesagsfigure,
Jesus Christus en die mensdom in die algemeen.
Levitikus 19:32 Uit eerbied vir jou God moet jy eerbied bewys aan oumense en hulle
met respek behandel. Ek is die Here.
1 Petrus 2:17 Julle moet alle mense respekteer en julle medegelowiges liefhê. Vrees
God. Eer die keiser.
Hebreërs 12:9 Verder, ons het ons aardse vaders gehad wat ons getug het, en ons
het vir hulle eerbied gehad. Sal ons, ons nie nog des te meer aan die Hemelse Vader
onderwerp en lewe nie?
Eksodus 20:12 Eer jou vader en jou moeder, dan sal jy lank bly woon in die land wat
die Here jou God vir jou gee.
Efesiërs 5:33 Elkeen moet sy vrou so lief hê soos hy homself liefhet, en ‘n vrou moet
aan haar man eerbied betoon.
Romeine 12:10 Betoon hartlike broederliefde teenoor mekaar; bewys eerbied
teenoor mekaar en wees mekaar daarin tot voorbeeld.
RESPEK impliseer ’n sekere optrede van ons, ’n optrede waar ons gedrag ’n sekere boodskap
oordra. Respek vorm die basis en vertrekpunt van ons optrede.
Hier waar ons by die sesde kamer vir die jaar is, kan mens nie anders om respek vir tyd te hê
nie. Wees dankbaar vir elke nuwe sonopkoms, leef en respekteer mekaar!
Vriendelike groete, Adv. Jaco Bothma
Besturende direkteur: Ons Tuis |