Augustus-maand, kenmerklik die maand van winde. En so kom die spreukwoordelike gedagte van “winde-van-verandering” by my op in die agste kamer van Ons Tuis.

VERANDERING, ons lewens verander daagliks. Elke dag het sy eie geluk en uitdagings. Mens het soms nie beheer of keuses as dit by veranderinge kom nie. Sekere veranderinge is moeilik of uitdagend, terwyl ander maklik en eenvoudig is. Beide maak ons egter sterker en is deel van die vorming van ons lewens en gevestig in ons DNA. Mense om ons verander, ons omgewing verander, ons land, ons, wetenskap-en - tegnologiese, onderrig, die wêreld in sy geheel. En so kan ons aangaan. Uit die volksmond is die gesegde: “As dinge nie verander nie, dan bly dit so”, wat nie ‘n getuigskrif is van die vinnige veranderde wereld waarbinne ons lewe nie. Die mens ervaar verandering reeds van die vroegste tye van bestaan. In die tuin van Eden het Adam en Eva die eerste mense geword wat verandering ervaar het, nadat hulle oortree het en God se opdrag geignoreer het. Hulle het die voordele van die tuin verloor. Verandering dui op die handeling of oorgang van een aanvanklike toestand na ‘n ander. ‘n Proses wanneer iets verander en “anders word”; verwysend na ‘n individu/voorwerp/handeling of situasie. Dit verwys na die verandering in huwelikstatus, ons word ouers, grootouers, kinders trou en verlaat die huis, die aankoop van ‘n nuwe motor of nuwe woonplek, nuwe beroep, verandering van dorp/stad, van vriende, van wisselkoers, klimaatsverandering, sosiale veranderinge, en verandering wat kom as ons die mense wat ons lief het aan die dood moet afstaan.

Ons as mens hou oor die algemeen nie van verandering nie, ons verkies dat dinge moet bly soos dit is omrede dit gerieflik is en ons gemaklik daarmee is; maar tog is verandering deel van ons daaglikse lewe op alle vlakke en is dit belangrik dat ons verandering positief moet ervaar en hanteer.

Hoe kan ons met VERANDERING as mens deel?

Bly positief ongeag die verandering. Aanvaar dat dit moeilik gaan wees om verandering te aanvaar/hanteer.

Emosies gaan deur verskillende fases van angs, woede, hartseer, blydskap, opwinding, dis normaal.

Pas jou omstandighede aan by jou persoonlikheidskarakter.Elke mens se persoonlikheid verskil, daarom reageer ons verskillende, een sal opgewonde wees om te verhuis terwyl dit vir die ander traumaties gaan wees.

Oorkom die vrees faktor. As jy ‘n vrees het vir verandering, samel genoegsame inligting rondom dit wat gaan verander in, hierdeur voorkom jy onnodige afleidings en aannames, wat die vrees net vergroot.

Skep ‘n ondersteuningsnetwerk. Praat met iemand na aan jou, wees eerlik, dis al manier hoe daardie persoon jou kan ondersteun of van raad kan voorsien. Verandering is ‘n integrale deel van elke individu en organisasie se bestaan, ons leef in ‘n tyd gekenmerk deur versnelde verandering. Maar die mens beskik oor die natuurlike vermoeë om saam met tyd te verander en aan te pas en die brein en denkpatrone het ‘n groot invloed op ons reaksies wat ons dan uitoefen.

Wanneer ’n persoon die Bybel bestudeer en toepas, is daar geestelike groei.

Hierdie groei word weerspieël in die veranderinge wat ‘n persoon in die lewe maak in ooreenstemming met wat geleer is en sodoende word ‘n Christelike persoonlikheid aangekweek ( Efesiërs. 4:22-24 ).

Die Bybel is ‘n bron van wysheid, aanmoediging en inspirasie vir miljoene mense regoor die wêreld. Dit is vol stories en leringe wat demonstreer hoe God in mense se lewens werk en hulle deur verandering en oorgang lei. “Daarom, as iemand in Christus is, is hy 'n nuwe skepsel; ou dinge het verbygegaan; kyk, alles het nuut geword.” – 2 Korintiërs 5:17

Met die kragtige woorde sluit ek af met die feit dat verandering onvermydelik is.

Met God se hulp kan ons die veranderinge in ons lewens navigeer. God is altyd daar, deur die berge en die dale van die lewe en Hy lei en beskerm ons met liefde en genade, ons moet net glo en vertrou. Moet nooit veranderinge vrees nie, maar omhels dit met die doelwit om ‘n verskil te maak in jou eie en andere se lewens.

Vriendelike groete,
Adv. Jaco Bothma
Besturende direkteur: Ons Tuis