Ons is hierdie maand in die kamer van “dankbaarheid” van Ons Tuis se huis. Ek het die voorreg om een lieflike Saterdagoggend in September ‘n koffiewinkel saam met vriende te besoek. Ek is dankbaar vir my familie en vriende wat sonder ophou gesels en lag en duidelik die oomblik geniet. Ek kyk om ons rond, daar is mense wat by tafeltjies sit met strak somber gesigte, sommiges lyk baie ongelukkig, bekommerd, ander is besig met werk of is in diep gesprekke met die wat hul tafel deel. Hier en daar vang my oor ‘n gesprek. “Die wêreld is nou so deurmekaar, daar is geen hoop meer nie.” “Het jy gesien die brandstofprys skiet weer volgende maand die hoogte in, nie eers te praat van die kragondebrekings.” Ongeveer 90% van die oggend se gesprekke was op ‘n negatiewe trant.

Die media verkondig daagliks horde negatiewe gebeure, wat sensasioneel van aard is wat strek vanaf misdaad, natuurrampe, brande, oorstromings, armoede tot werkloosheid, alles wat bydra tot die negatiewe in ons daaglikse lewe, en wat ook nie net beperk is tot Suid-Afrika nie, tans ‘n wêreld-tendens.

Na ‘n baie lekker kuier en oppad huis toe tref dit my dat ten spyte van alles wat rondom my gesê was en die totale negatiwiteit wat te speur is, is daar groot dankbaarheid in my hart en siel. Dankbaarheid vir my gesin, my vriende, my lewe en bo alles dankbaarheid aan God wat alles vir ons gee, wat vir ons aan die kruis gesterf het.

Die aand lees ek Filippense 4: 4 – 8:  Wees altyd bly in die Here! Ek herhaal: Wees bly! Wees inskiklik teenoor alle mense. Die Here is naby. Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.

Die Bybel is gevul met verse wat met ons praat oor dankbaarheid; en dat ons God en ons medemens moet dank met dankbaarheid.

Kolossense 3:15: Verder, laat die vrede van Christus in julle harte regeer. As lede van een liggaam, is julle juis daartoe geroep. En wees dankbaar.

Kolossense 4:2: Volhard in gebed. Wees waaksaam en dankbaar as julle bid.

Dankbaarheid vir wat ons daagliks ontvang, is ongelukkig dikwels ’n vreemde verskynsel by baie mense. Baie glo hul het gewerk vir wat hulle ontvang. Natuurlik is dit nodig om te werk. Paulus skryf dan ook dat mense wat nie werk nie, nie kan eet nie. Maar as jy werk, mag dit egter nie jou dankbaarheid en afhanklikheid minder maak nie.
Wanneer ons dankbaar is, fokus ons op wat ons het en sien al die seëninge in ons lewens raak. As ons nie dankbaar is vir wat ons reeds het nie, gaan ons fokus op die dinge wat ons nie het nie en ongelukkig raak daaroor.

In ‘n studie is mense in drie groepe verdeel, een groep is gevra om elke dag ‘n paar sinne te skryf oor dinge waarvoor hulle dankbaar was. Die tweede groep moes skryf oor alles wat hulle geïrriteer en ongelukkig gemaak het en die derde groep moes net skryf oor wat met hulle gebeur het sonder om te fokus op die positiewe of die negatiewe.

Na 10 weke was dié wat geskryf het oor die dinge waarvoor hulle dankbaar was, baie meer optimisties en het beter gevoel oor hulle lewens as diegene wat op die negatiewe gefokus het.

Dit laat my dink aan die storie van ‘n boemelaar se les oor dankbaarheid.

Andy (‘n skuilnaam) vertel sy storie:

‘Ek is 58. My lewe het ’n skewe draai geloop. Alles my eie skuld. Om weer onder te begin is nie maklik nie. ’n Ou moet maar baie hare op jou kop hê om dit reg te kry. Maar met God in jou, kan jy dit doen.

My swak besluite het my twee en ’n half jaar op straat laat beland. Letterlik. Ek het saam met die “boemies” gelewe. Dit wat ek daar gesien het, is hartverskeurend.

Gelukkig het ek nie in “daardie groef” geval van drink en alles vergeet nie. Ons gewone mense raak kwaad as hulle bedel net om ’n “kannetjie” te kan koop, maar ’n dag raak lank as daar geen vooruitsig vir die dag is nie.

Net toe ek in die straat moes begin bly het dit een nag gereën soos met die vloed. Ek het nie komberse gehad nie. Ek was deurnat. Niemand wou help nie.

Op daardie stadium het die kerk my ’n kamer gegee om in te bly. Ek bly al ses maande in die plek en is tans besig om my lewe met God reg te maak. Dis nie maklik nie.

Een ding van hierdie journey is dat ek geleer het om dankbaar te wees vir my bed, komberse, ’n kussing en ’n dak oor my kop. Ons gewone mense beskou dit as ’n “moet” en deel van die lewenspakket. Dankbaarheid is ’n woord wat ons nie reg verstaan nie.

En hoe reg is Andy nie. “Dankbaarheid is ’n woord wat ’n mens nie reg verstaan nie.” Andy het alles verloor en op die straat gesit sonder ’n kombers of ’n reënjas. Hy verstaan om niks te besit nie. Daarom verstaan hy ook van dankbaarheid vir die kleinste dingetjie en gebeurtenis.

Wanneer ’n mens jou vinger sny, kry jy mos elke keer seer as jy aan iets  raak of optel. Dan eers besef ’n mens wat jou hande alles doen. Dan is ’n mens dankbaar vir die gebruik van jou hande. Moet ons eers ’n besering opdoen of soos Andy alles verloor om dankbaar te wees?

Ons het soveel om voor dankbaar te wees. Vir die genade van God wat ons uitgekies het om Sy kinders te wees. Om te gaan slaap met ’n kombers en ’n kussing en ’n dak oor ons kop. Om in die oggend wakker te word en ’n hart wat klop. Om asem te haal en die voëls te hoor tjirp. Vir familie en vriende. En so kan ons elkeen ons lysie langer maak.

Dankbaarheid moet ons hele lewe se vertrekpunt wees. Dit is een van die geheime van ‘n gelukkige lewe. As ek en jy dit kan reg kry om met dankbaarheid te leef, verander dit die wêreld vir ons. Mense wat deur dankbaarheid gedryf word is positief en wil vir ander ook die lewe gun en soek plekke om van hul dankbaarheid uit te deel en ‘n verskil te maak. Kyk verby dinge wat ons negatief skoei en sien die seën wat ons het raak.

Leef jy, jou dankbaarheid, elke dag, met daad en woord uit. Verander jou daaglikse groet met die woord “Dankie”. 

My gebed van dankbaarheid:
Dankie, Here, vir alles waarmee U ons inwoners en werknemers seën. Help ons om in dankbaarheid te leef, ook wanneer ons swaarkry, want dan is dit vir ons moeiliker om U hand en U versorging raak te sien, al weet ons U is altyd by ons. Amen.

Ek groet u met “Dankie”!

Vriendelike groete,
Adv. Jaco Bothma
Besturende direkteur: Ons Tuis