In ons hedendaagse bestaan is die mens aanhoudend besig met vooruitgang.

Rekenaartegnologie is verstommend, ruimtereise na Mars, motors en wapens wat lyk soos iets uit 2050 se films, gevorderde en verbeterde mediese uitvindsels wat lewens aansienlik verbeter en in sommige gevalle selfs verleng.

Dit bring my by die volgende kamer van Ons Tuis huis, naamlik goeie gesondheid. En meer spesifiek gesondheid soos wat die jare aanstap, ons streef almal daarna om met grasie, respek en betekenis te verouder.

Gesondheid is die vlak van funksionele of metaboliese doeltreffendheid van ‘n lewende organisme. By mense is dit die individu se vermoë om aan te pas en jouself te versorg wanneer daar voor fisieke, geestelike of maatskaplike uitdagings te staan gekom word.

Wanneer ons jonk is, is dit moeilik om te glo ons kan siek word, en is ons geneig om die onderwerp van gesondheidsrisiko’s te vermy. Covid-19 en die inperking het egter gewys dat dit vir ons moeilik is om dinge te hanteer wanneer ons denk-roetine ontwrig word.

Die liggaam ondergaan talle veranderinge wanneer mens ouer word. Take wat inspanning vereis kan uitdagend wees. Behendigtheid neem af, spiere verloor krag en uithouvermoë is minder - alles deel van natuurlike veroudering.

Wanneer ‘n ouer persoon val of siek word, reageer die liggaam anders as by jonger persoon en die herstel duur langer. Dit is nie ongewoon dat ouer persone meer as een chroniese siekte toestand het nie

Daar is baie klem deesdae op sinvolle aktiewe veroudering, mobiliteit en onafhanklikheid. Mense wat reeds van ʼn vroeë ouderdom ʼn gesonde leefstyl handhaaf is geneig om die vrugte daarvan te pluk soos hulle ouer word.

Deur egter na jou gesondheid om te sien en ʼn gesonde leefstyl te handhaaf kan jy baie van die veranderinge vertraag en jouself minder vatbaar maak vir sekere chroniese siektetoestande wat algemeen by ouer mense voorkom, soos artritis en osteoporose.

Daar is ‘n verskeidenheid maniere om jou gesondheid te verbeter selfs al begin jy eers op jou oudag daarmee.

Wenke om gesond te verouder:

1. Eet gesond: Dieët is belangrik. Soos mens ouer word verander jou metabolisme en spysvertering. Gesonde kossoorte, wat vitamiene en minerale bevat is baie belangrik.
2. Oefeninge: ‘n Gesonde liggaam huisves ‘n gesonde gees. Oefening help om meer krag en mobiliteit te behou.
3. Mediese ondersoek: Dit is belangrik om voorkomend op te tree en gereeld vir mediese ondersoeke te gaan. Sodoende kan gesondheidsprobleme vroegtydig geidentifiseer en onmiddellik behandel word.
4. Geestesgesondheid: Ouer volwassenes loop die risiko om geestes- en neurologiese afwykings te ontwikkel. Bejaardes kan om verskeie redes depressief raak, insluitend weens die verlies aan ʼn lewensmaat of fisieke siektes. Ander toestande sluit in angsversteuring en demensie. Leefstyl veranderinge kan hier help.
5. Slaap: Ouer persone is ook meer geneig om slaapprobleme te ontwikkel. Sorg dat daar genoeg gerus en geslaap word.
6. Hou die brein fiks: Die brein moet soos ‘n spier geoefen word en daagliks gestimuleer word. Lees, speletjies, blokraaisels of ‘n nuwe stokperdjie is goeie brein-oefeninge.

Ter afsluiting is daar legio voordele wat goeie gesondheid vir alle persone inhou:

1. voortgesette onathanklikheid;
2. verhoogde lewenskwaliteit;
3. beter fisiese en geestelike gesondheid
4. gewigbeheer;
5. beter postuur en balans;
6. meer beweeglike gewrigte
7. sterker bene en spiere;
8. beter hart- en longfunksie;
9. laer risiko van hartsiektes, diabetes, sommige kankers en hoë bloeddruk;
10. verbeterde spysvertering
11. meer energie
12. beter slaap;
13.  minder angs en depressie

“Vriendelike woorde is soos ‘n heuningkoek: soet vir die siel en ‘n genesing vir die gebeente.” – Spreuke 16:24.

Hier by Ons Tuis wil ons ons inwoners en werknemers aanmoedig om na hul gesondheid om te sien.

Goeie gesondheid word vir almal toegewens!

Vriendelike groete,
Adv. Jaco Bothma
Besturende direkteur: Ons Tuis