Hier waar ons die maand Junie 2024 bereik het, besef ons net weereens hoe vining tyd eintlik verby snel. Ons het in Januarie 2024 ons wedloop begin, kilometers verder kyk mens terug op die pad wat reeds met sukses voltooi is, maar besef terselfdertyd dat daar ook nog ‘n gedeelte van die einste wedloop voorlê. En dat die gedeelte vol opdraendes, uitdagings, struikelblokke en beproewings kan wees.
Dit is 'n wedloop wat nie net fisiese uithouvermoë vereis nie, maar ook geestelike krag en DEURSETTINGSVERMOË. Deursettingsvermoë is dan ook die maand ons fokus in ons eie persoonlike geestelike wedloop. In Hebreërs 12:1: lees ons “Laat ons met volharding die wedloop hardloop wat voor ons lê.” Hierdie vers herinner ons aan die belangrikheid van deursettingsvermoë om ons Christelike wedloop te voltooi. Deursettingsvermoë is die sleutel tot die bereiking van ons daaglikse doelwitte.
Deursettingsvermoë word geag as die vermoë om standvastig te bly in die aangesig van uitdagings, om aan te hou streef na jou doelwitte, selfs wanneer dit onbereikbaar lyk. Dit beteken om nie op te gee nie, selfs al voel dit asof alles teen jou inwerk.
Dit is belangrik om jou geloof te behou, ongeag die struikelblokke wat jy mag teëkom, in die wedloop.
Dink ons in ons lewe terug aan tye waar ons aan deursettingsvermoë geklou het, op skool, universiteit, waar die ligte laat aande gebrand het, jy moeg was maar deurgedruk het met jou studies en sukses behaal het en so kan elkeen van ons talle voorbeelde uit ons spore van gister gaan haal waar deursettingsvermoë ons gehelp het om ons doelwitte te bereik en vorentoe te beweeg.
Job se verhaal is een van die bekendste voorbeelde van deursettingsvermoë . Hy het alles verloor - sy rykdom, sy gesondheid, en sy kinders - en tog het hy geweier om sy geloof in God te verloën. |
Job het nie verstaan waarom hy gely het nie, maar hy het aan sy geloof vasgehou en uiteindelik is hy geseën vir sy volharding.
Die apostel Paulus het talle vervolginge, gevangenisstraf en fisiese lyding verduur ter wille van die Evangelie. In 2 Korintiërs 11:23-28 beskryf hy die talle beproewings wat hy deurstaan het, maar sy deursettingsvermoë het hom in staat gestel om sy missie voort te sit.
Die uiteindelike voorbeeld van deursettingsvermoë is Jesus Christus self. Hy het lyding en kruisdood verduur om die mensdom te red. In die tuin van Getsemane het Jesus gebid en geworstel met die swaar las wat voor Hom gelê het, maar Hy het volhard in Sy missie om die wil van die Vader te vervul.
Gebed is 'n kragtige hulpmiddel en sinoniem met deursettingsvermoë. Dit versterk ons geloof, en gee ons die krag om aan te hou wanneer ons swak voel in die wedloop.
Deursettingsvermoë is nie net vir groot beproewings nie, maar speel ook 'n rol in die alledaagse lewe. Dit kan in klein daaglikse keuses manifesteer, soos om eerlik te bly in 'n situasie waar oneerlikheid die maklike uitweg is, of om vriendelik te wees teenoor iemand wat ons onregverdig behandel.
Om jou wedloop te voltooi vereis deursettingsvermoë. Die lewe sal altyd uitdagings bied, maar met 'n standvastige geloof en deursettingsvermoë, kan ons die wedloop suksesvol voltooi en uiteindelik die oorwinningskroon van geregtigheid ontvang.
Mag ons almal die wedloop met deursettingsvermoë hardloop om dit suksesvol te voltooi!
Vriendelike vasbyt groete
Adv. Jaco Bothma
Besturende direkteur: Ons Tuis
|