Dis Augustus en die afsluitingsfunksie van die 2024 Olimpiese Spele is sopas verby. Om toe te kyk hoe van die wêreld se bestes aantree, doelgerig om hul beste te lewer om die wenstreep en hul drome met sukses te verwesenlik. Rekords het gespat, trane van vreugde het gevloei, mens kon net met verwondering toekyk.

Daar was ongelooflike oomblikke soos toe die paalspring-atleet, Armand Duplantis van Swede die wêreldrekord breek, net om minute later met gemak wéér sy eie wêreldrekord te oortref. Die 100 m en 800 m-wedloop vir mans waarin ses van die atlete almal millisekondes van mekaar oor die wenstreep snel. Elkeen doelgerig om sy/haar beste te lewer om ‘n medalje te verower. Doelgerigtheid is dan ook ons onderwerp vir die maand, om te kyk hoe dit ons in ons eie wedloop kan aanspoor.

In die wêreld van vandag, waar uitdagings en onsekerhede gereeld ons paaie kruis, is daar min dinge wat meer bevredigend is as om met doelgerigheid en geloof deur die lewe te beweeg. Die idee van ’n wedloop as 'n simbool vir ons lewenspad is 'n kragtige een, en om dit met 'n doelgerigte benadering te benader en te voltooi, kan ons help om ons doelwitte te bereik en ons lewensmissie te vervul.

Doelgerigtheid is ’n waardevolle eienskap wat ons as inwoners en werknemers van Ons Tuis kan ontwikkel om sukses in verskeie aspekte van die lewe te bereik. Dit behels die vermoë om op 'n bepaalde doel gefokus te bly, ongeag die struikelblokke wat jy mag teëkom.

Hebreërs 12 verwys telkens na die wedloop wat ons moet voltooi. Hierdie gedeelte herinner ons dat die lewe 'n wedloop (reis) is wat vereis dat ons gefokus en doelgerig moet wees om die einddoel te bereik.

Doelgerigheid in geloof beteken om oor 'n duidelike visie te beskik van wat ons wil bereik en om daaraan vas te hou, selfs wanneer ons teëspoed mag ondervind in ons lewenswedloop. Dit is belangrik om te besef dat die wedloop nie altyd glad en sonder struikelblokke sal wees nie. Die pad wat voor ons lê, kan vol uitdagings en moeilike omstandighede wees, maar dit is juis deur doelgerigtheid en geloof dat ons in staat sal wees om enige hindernis te oorkom en ons doel te bereik.

Om doelgerig te leef in geloof beteken ook om onsself gereeld af te vra wat ons werklike doel in die lewe is. Dit is maklik om vasgevang te raak in die daaglikse roetine en te vergeet van ons diepste aspirasies. Ons doelwitte moet duidelik wees en hoe ons geloof ons kan lei om dit te bereik. Dit is in die stil oomblikke van refleksie en gebed dat ons die helderheid kan vind om ons pad vorentoe te bepaal.

Een van die sleutels tot 'n doelgerigte lewenspad is om ons prioriteite reg te stel en om ons tyd en energie te bestee aan wat regtig saak maak. Dit beteken om nie net te fokus op onmiddellike bevrediging of korttermyn doelwitte nie, maar om dié groter prentjie in ag te neem en te werk na 'n langtermyn visie wat in lyn is met ons geloof en waardes.

In hierdie proses van doelgerigte lewe en wedloop voltooiing, is dit belangrik om medegelowiges, en mekaar as inwoners en werknemers van Ons Tuis, te hê wat ons kan ondersteun en aanmoedig. Die apostel Paulus sê in 1 Korintiërs 9: “Julle weet dat al hardloop ’n klomp mense in ’n resies daar net een wenner kan wees. Moenie die spel van die lewe speel met die doel om tweede te kom nie. Leef jou lewe so dat jy wen. As iemand ’n resies wil wen, oefen hy eers hard. Met ’n gewone resies is die prys vir die wenner klein, maar in die resies van hierdie lewe is die prys vir die wenner baie groot en dit hou vir altyd”

Die waarde van doelgerigtheid lê in die vermoë om deur te druk wanneer dinge moeilik raak. In enige strewe sal daar uitdagings en struikelblokke wees. Dit is in sulke tye dat doelgerigtheid jou help om aan te hou, ten spyte van teleurstellings en terugslae. As 'n atleet wat vir 'n wedloop oefen, moet jy doelgerig bly, selfs wanneer jy moeg is of pyn ervaar, omdat jy weet dat die einddoel die moeite werd is.

Ons moet altyd onthou dat ons uiteindelike doel nie net is om die wedloop te voltooi nie, maar om dit met eer en waardigheid te doen. Ons lewe moet nie net gefokus wees op die einddoel nie, maar ook op hoe ons die reis aanpak en die waarde wat ons bring aan die inwoners en werknemers rondom ons.  Ons geloof is nie net 'n persoonlike reis nie, maar dit beïnvloed en inspireer ook ander om saam aan die wedloop deel te neem.

Om doelgerig in geloof te leef en die wedloop te voltooi is ’n uitdagende, maar bevredigende taak. Deur ons pad met geloof en doelgerigheid te volg, kan ons nie net die wedloop voltooi nie, maar ook die volle vreugde en vervulling daarvan beleef.

Hier by die Ons Tuis-span weet elkeen dat hy/sy net voor, langs of agter hom/haar kan kyk en sien dat daar altyd iemand sal wees om te ondersteun, sodat elkeen sy/haar doelwitte kan bereik om die wedloop met sukses te voltooi.

Vriendelike toegewyde groete

Adv. Jaco Bothma
Besturende direkteur: Ons Tuis