Waar ons aan die vooraand van Kersgety 2022 staan, het ons almal terugflitse op die afgelope jaar wat soms deur stormgetye en soms deur kalmte gegaan het. Daar was lyding waar ons voor ʼn geliefde of ʼn bekende se graf gestaan het, leed waar ons blootgestel was aan siektes, vreugde waar ʼn huwelik bevestig is, of waar sommige die status van oupa en ouma, oupagrootjie en oumagrootjie verwerf het.
Inwoners en werknemers van Ons Tuis is aan verskeie uitdagings en lewenservaringe gedurende 2022 blootgestel wat suksesvol trotseer is.
Die ervaring van vreugde, geluk en samesyn gedurende 2022 het ons egter weer geloof, hoop en liefde gegee waarop ons kan bou as deel van die fondasie van 2023.
Waar ons voor die Kersfeesboom staan, weet ons dat die grootste geskenk van alle tye reeds toegedraai is en vir ons wag, en dit is die liefde van ons Hemelse Vader – ʼn geskenk vir onsself en ʼn geskenk wat ons kan deel. Hierdie geskenk van liefde wat alle verstand te bowe gaan, kan niks en niemand van ons af wegneem nie.
Johannes 3:16 verwoord hierdie liefde: “God het die wêreld so liefgehad dat Hy sy enigste Seun gegee het, sodat die wat in Hom glo, |
nie verlore sal gaan nie, maar die ewige lewe sal hê. Dit is liefde wat ons elke dag kan aangryp en kan leef, wetende dat ons nooit alleen is nie en dat God elke minuut van elke dag in ons menslike skaduwee is.
Mag jul feesgety gevul wees met liefde, vrede en welwillendheid en mag elke dag vir julle vreugde bring in die jaar wat voorlê. “Kersfees is nie ʼn tyd of ʼn seisoen nie, maar ʼn ingesteldheid van jou gees. Om vrede en welwillendheid te koester, om vrygewig te wees met jou genadegawes – dit is die ware gees van Kersfees.” (Calvin Coolidge)
Mag die Kind wat vir ons gebore is julle vul met sy liefde en hoop, sodat ons saam met die engele sal sing: “Ere aan God in die hoogste Hemele en vrede op aarde in alle welbehae”.
ʼn Baie geseënde Kerstyd en ʼn voorspoedige 2023.
Mag dit ʼn nuwe jaar van vreugde, geluk en goeie gesondheid wees.
Kersfeesgroete
Adv. Jaco Bothma
Besturende direkteur: Ons Tuis |