Geskiedenis

Die eerste ONS TUIS-tehuis het op 1 April 1929 die lig gesien toe mev. Machteld Postmus sy deure in Pretoria geopen het. Min het sy geweet dat die maatskappy — wat sonder winsbejag daarop sou fokus om behuising aan ouer persone te verskaf — sou uitbrei tot ‘n groep aftree-oorde wat nagenoeg 1,100 persone kan versorg en huisves.

Die projek het in 1942 vlerke gekry toe Hervormde Kerk, met mev. Postmus as die voorsitter van die direksie, die bestuur daarvan oorgeneem het. Met die ondersteuning van die kerk en deur sy lidmate se betrokkenheid en ondersteuning het ONS TUIS van krag tot krag gegaan om ‘n veilige heenkome te skep waar ouer persone hul goue jare kan geniet.

ONS TUIS spog met agt aftree-oorde in drie van Suid-Afrika se provinsies. Behuisingsopsies wissel van selfsorg-eenhede (kamers en woonstelkomplekse) tot gespesialiseerde sorg vir persone met demensia of Alzheimer se siekte.

Ons bekwame personeel skep ‘n atmosfeer van meelewendheid sodat enige persoon vinnig sal aanpas en maklik sal inskakel. Met dienste soos gebalanseerde etes, wasgoed en puik versorging het die tyd nou waarlik aangebreek om agteroor te sit en die lewe voluit te geniet!

Kontak ons gerus om uit te vind of daar ‘n behuisingsopsie is wat by u behoeftes pas!

Gemeenskapsbetrokkenheid

Ouer persone is ‘n onskatbare bron van kennis en ervaring , asook ‘n onuitputbare bron van stories oor hoogtepunte in hul lewens en ons land se geskiedenis. Daarom erken ons die rol wat hul speel en bied ons aan hul die geleentheid om steeds ‘n bydra tot die toekoms van Suid-Afrika te maak.

Meerendeel van ons inwoners is nog vol energie en daarom is ONS TUIS nog nou by die gemeenskap betrokke. Ons bak-en-brou, maak produkte en bied markte aan vir fondsinsamelings, gedenk spesiale dae op die kalender op ‘n besonderse wyse en bied werkswinkels en selfverrykkingskursusse vir inwoners aan.

Ons nooi u dus uit om ONS TUIS te nader oor hoe ons op-en-wakker inwoners hul liefde in u projek of gemeenskap kan terugploeg!

Familie-betrokkenheid is natuurlik vir ONS TUIS ‘n prioriteit. Daarom bied ons ook gereeld geleenthede om vriende en familie van inwoners te betrek.

Ons is dankbaar vir ‘n verskeidenheid van kerke (alle denominasies) wat ons deur bybelstudies, bidgroepe, liefdadigheidsbesoeke en fondsinsamelingsprojekte ondersteun. Hierdie geestelike en fisiese betrokkenheid  lewer ‘n onskatbare bydra om na die welsyn van ons inwoners om te sien.

ONS TUIS verwelkom ook skole en studente wat by bejaardesorg betrokke raak. Hierdie blootstelling leer kinders en jongmense hoe om ouer persone met respek en deernis te hanteer. Hul kom bied graag speletjies vir die “oupas en oumas” aan en kan nie uitgeluister aan hulle stories en staaltjies nie.

Tyd is die een skaars ding hier op aarde en ons inwoners het baie liefde, lewenswysheid en aandag om te gee. Kontak ons gerus om uit te vind hoe jy by die ONS TUIS-familie kan inskakel!

Borge

Ons ondervind dat almal se voorsiening vir aftrede nie noodwendig uitwerk soos beplan nie. Daarom is ONS TUIS toenemend afhanklik van donasies, borge, skenkings en erflatings.

Indien dit op u hart druk om ons finansiële las op ‘n manier te verlig, sal ons dit hoog op die prys stel.

raak betrokke

Ondersteun
ons projekte

Raak betrokke
by ons veldtogte